Breiðafjarðarfléttan höfðar til fuglaskoðara

Breiðafjarðarfléttan, eða "Fléttan," er samstarfsverkefni ferðaþjónustuaðila á Snæfellsnesi, í Dölum og á sunnanverðum Vestfjörðum. Fléttan er að vinna svæðisbundna vöruþróun og að uppbyggingu í fuglaskoðun á starfssvæði hennar  með aðstoð færustu sérfræðinga. Hugmyndafræðin byggir á því að með aðstoð sérfræðinga, svo sem líffræðinga, náttúrufræðinga og markaðsfræðinga verði búin til verðmæti í ferðaþjónustu sem eru stíluð inn á ákveðinn markhóp sem í þessari vinnu er hinn gríðarstórri markhópur; uglaáhugamenn.  Dagana 12. og 13. febrúar næstkomandi verður haldinn vinnufundur að Langaholti á Snæfellsnesi.

Einn útaf og sex óku of hratt

Sex ökumenn voru teknir fyrir of hraðan akstur í umferðareftirliti lögreglunnar á Akranesi í liðinni viku. Þá missti ökumaður á leið norður Vesturlandsveg stjórn á bifreið sinni með þeim afleiðingum að hún hafnaði utan vegar. Ökumaðurinn sem var einn í bifreiðinni slasaðist og var fluttur á sjúkrahús. Að öðru leyti var vikan tiltölulega róleg hjá lögreglunni á Akranesi. 

Tvinnbíll til Þjóðgarðsins Snæfellsjökuls

Fyrir skömmu festi Umhverfisstofnun kaup á nýjum bíl til notkunar í Þjóðgarðinum Snæfellsjökli. Bíllinn er af gerðinni Toyota Prius og er svokallaður tvinn-bíll.  Hann er sparneytinn og notar bæði rafmagn og bensín eftir því sem hentar hverju sinni. Bíllinn er almennt álitinn með umhverfishæfari bílum og eru kaupin hugsuð sem byrjunarskref fyrir visthæfari bílaflota stofnunarinnar.  Umhverfisstofnun keypti jafnframt Volkswagen Passat bíl fyrir starfsemina í Reykjavík en sá bíll getur gengið fyrir metani eða bensíni. Þrátt fyrir þessa bíla þarf Umhverfisstofnun að nota stóra bíla í ákveðin verk víða um land svo sem yfir sumartímann í þjóðgarðinum. 

Grunnskólum ekki lokað en sparað á öllum sviðum

Á fundi byggðaráðs Borgarbyggðar í síðustu viku voru skólamál til umræðu. Oddvitar meirihlutaflokkanna, Björn Bjarki Þorsteinsson Sjálfstæðisflokki og Sveinbjörn Eyjólfsson Framsóknarflokki lögðu fram bókun um skólamál sem var samþykkt samhljóða, þar sem Finnbogi Rögnvaldsson oddviti Borgarlistann fagnaði henni með sérstakri bókun. Með þessari bókun er búið að eyða óvissu um framtíð grunnskóla í sveitarfélaginu, að minnsta kosti út þetta kjörtímabil. Samkvæmt henni er fallið frá hugmyndum um lokun starfsstöðva grunnskóla. Í stað þess á að ná fram lækkun kostnaðar með því að dregið verður úr fjárveitingum til allra starfsstöðva grunnskólanna samkvæmt fjárhagsáætlun sveitarfélagsins. Þá verður viðmiðunum um fjölda nemenda í bekkjum breytt og það hækkað, samkennsla verður aukin og stöðugildum fækkað. Varmalandsskóli og Grunnskóli Borgarfjarðar verða sameinaðir undir eina stjórn og fimmti bekkur á Hvanneyri verður fluttur að Kleppjárnsreykjum.

Ráðstefna um hverju búsáhaldabyltingin skilaði

Föstudaginn 12. febrúar nk. mun Háskólinn á Bifröst standa fyrir ráðstefnu í Iðnó í Reykjavíku. Bryndís Hlöðversdóttir, aðstoðarrektor Háskólans á Bifröst, mun setja ráðstefnuna klukkan 13:00 og stendur dagskráin til 17:30. Ráðstefnan er opin og allir velkomnir – ekkert þátttökugjald. Þar munu fræðimenn úr hugvísindum, félagsvísindum og lögfræði velta upp þeirri spurningu hvort og þá hverju Búsáhaldabyltingin hefur skilað og jafnframt hvort að líta megi á hana sem birtingarmynd breyttra stjórnmála á Íslandi. Sex erindi verða flutt og opnar umræður í kjölfar hvers erindis. Í lok dagsins verða pallborðsumræður þar sem velt verður upp spurningum um efni erindanna. Fundarstjóri verður Eva Heiða Önnudóttir, stjórnmálafræðingur við Háskólann á Bifröst.